الخميس , 18 أكتوبر 2018
أهم الأخبار
الرئيسية 1 مصر بعد 3 يوليو 1 تقارير حقوقية 1 زوجة الصحفي المعتقل هشام جعفر بعد مرور ثلاث سنوات علي اعتقاله
هشام جعفر

زوجة الصحفي المعتقل هشام جعفر بعد مرور ثلاث سنوات علي اعتقاله

 

بعد انقطاع لأكثر من شهر عن التواصل مع محبي الصحفي هشام جعفر ،كتبت الدكتورة منار الطنطاوي علي حسابها الرسمي بموقع” الفيسبوك”

السلام عليكم

اكتب اليكم بعد انقطاع اكثر من شهر لظروف مرضية. شكرا لكل اللى سألوا عليا و اللى فكروا فيا و ظروفهم مسمحتش يكتبولى. كان لازم هدنة اجبارية لانى حاولت كذا مرة و كانت فترات قصيرة دى طولت فيها شوية.

حاولت اكتب لما هشام اتجددله يوم السبت 29سبتمبر 2018 لكن فعلا مقدرتش و بكده يبقى دخلنا فى السنة الرابعة . رابع سنة كلها ظلم و قهر و حزن حتى فى اللحظات اللى مفروض ابقى طايرة من الفرح كنت بفرح لكن افتكره و هو فى حبسته و مش قادر يفرح معانا تتحول لحزن .

اربع سنين تهمته عشان كتب ابحاث تخص المرأة و الاسرة و الفتن الطائفية و تدريب دعاة للظهور الاعلامى و غيره من الأعمال اللى شافتها الدولة بعين أخرى مش لصالح وطن.

اقسى سنة هى السنة اللى فاتت الثالثة و اللى متوقعة ان اللى جاية اصعب و اللى بعدها اصعب و اصعب.

سنة معظم الناس خرجوا فيها ما عدا هشام ليه مش فاهمة؟ طيب ايه تهمته ؟ برضه مش فاهمة طيب ليه تحطوه فى قايمة ارهابيين ؟ برضه مش عارفة. طيب ليه تطلعوا قرار تحفظ و لا مصادرة و لا مش عارفة لاننا مش عارفين نشوف القرار. سلسلة من الصدمات المتتالية اللى مش بتلحق تلقط نفسك فيها و كله بيمر و انت مش فاهم و لا عارف ليه . هو احنا غلطنا فى ايه فى البلد علشان يتعمل فينا كده ؟ سؤال محدش يقدر يجاوب عليه.

3سنين و انت بتتعرض لضغوط من اتجاهات عديدة و بتقاوم و تحاول تصلب طولك و تقول بتعلم و بستفيد بس بتعلم و بستفيد لايه علشان اواجه ايه و انا مش فاهمة حاجة 3سنين.

11شهر لم نراه و لا نعرف عنه حاجة خالص طيب ليه ؟ يا ترى بيتعرض لانتهاكات شكلها ايه و قافلين الزيارة علشان احنا منعرفش حاجة؟

يا ترى شكله بقى ايه زى اخر زيارة و لا اتغير ؟ كنت الاول بجيب صوره و بقعد ابصلها علشان منساش ملامحه😢😢بس للاسف ملامحه هتبقى اكيد اتغيرت و بهتان لونه زاد و شعره الابيض مسبش مكان فى راسه. يا ترى جسده النحيل اتغير و لا زاد نحولا و وهن عظمه😢😢.

اسئلة كتير ملهاش اجابة و دموعي كترت عن الاول و ملامحى بقى شكلها حزين و اتغيرت لو شافنى مش هيعرفني الحزن سيطر على كل حاجة جوايا.

تعبت انى امثل دور رب الاسرة و سيدة الاسرة و عمود الاسرة تعبت و مش قادرة اشيل بس مش لايقة اللى يسند معايا و يشيل قصادى😢😢.

بحمل هم كل حاجة اللى فى السجن و اللى بره السجن .

بكلم ربنا كتير و بقوله ساكت عليهم ليه يارب 😢😢.

مهما حاولت اخفف عن نفسي بتبقى وقتيه لكن بفكر فيه ليل و نهار .

كل لحظة حلوة او وحشة ببقى عايزاه جنبي 😢😢.

هشام مش جوزى ده ابنى الكبير اللى كنت بحمل همه اكتر من ولادى.

بقول لنفسي عيشي الواقع و عديه لكن مش بقدر امثل الا فترة بسيطة و مهما ضحكت و هزرت بتجيلى بعدها غصة شديدة 😢😢.

يوم حفل تخرج بنتى اللى هشام استناه و كان بيتمنى يشوفه المفروض انزل و افرح و ابقى طايرة لكن ضغطت على اعصابى لغاية لما تنزل علشان انفرد بنفسي و ابكى 😢😢😢😢. يا ترى انت عامل ايه دلوقتى و انت عارف ان بنتك اتخرجت و محرومة من وجودك معاها فى يوم زى ده لسبب مش معروف.

كل سنة الناس بتبعد اكتر و بتتعود على الوضع اللى احنا فيه .

و احنا اتعودنا ان احنا لوحدنا و كل معاه عذره.

كل سنة بكتب عن حالتى فيها.

زوجة هشام جعفر تكتب بعد مرور عام. زوجة هشام تكتب بعد مرور عامين و تلاتة و اللى جايه هكتب بعد اربعة و خمسة لغاية امتى . كل سنة بقول اخر سنة اكتب فيها و بستمر الى ما لا نهاية.

الظلم الظلم الظلم ليس له نهاية و بيستمر الى ما شاء الله.

عذرا لمن احزنه كتاباتى و عذرا لمن عكننت عليه بهذا البوست لم ارد لاحد الا كل الخير لكن اردت ان اكتب عن مشاعرى مع بداية عام رابع فى الاعتقال لزوجى الباحث و الصحفى #هشام_جعفر

شاهد أيضاً

معصوم مرزوق

تجديد حبس معصوم مرزوق ويحيى القزاز و4 آخرون 15 يومًا

  قررت نيابة أمن الدولة العليا، اليوم الأربعاء 17 أكتوبر، تجديد حبس السفير معصوم مرزوق ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *